نظم
د پښتون ژړا
ګل پاچا الفتپښتونه! خدای ږو ستا په حال باندې ژړا راځي
له هر طرفه په تا څه تورې بلا راځي
پخپله خاوره پخپل خق ته وژل کېږي مدام
د سختو زړونو خاوندان په کاله ستا راځي
ستاپه تاريخ کښې چې هر څو ليرې نظر کومه
گورم چنگيز يا هلاکو يا اتيلا راځی
نه ارسطو نه افلاطون راځي يونانه ځنې
ايستلې توره سکندر په دغې خوا راځي
دخيبر هره گټه سره ده ستا په وينو باندې
يو وخت اورنگ بل وخت فرنگ په پښتونخوا راځي
غليمان ستا د ازادۍ له حده زيات وينمه
نه د مسلم نه دکافر رحم په تا راځي
کراچی وال غواړي پښتون په کراچۍ وتړي
په داسې شان بې تميزۍ دخرو خندا راځي
په سپک نظر يوه ملت ته گوري هغه کسان
چې يې په خيال کښې اراده د استيلا راځي
خوشحال په خوب کښې راته وې پاڅه مغل راغلی
پښتون خبر کړه چې جگړې په وطن بيا راځي