دا څه مخ دی منور

دا څه مخ دی منور

چې هم شمس دی هم قمر

دا څه زلفې دي مښکينې

چې هم مښک دي هم عنبر

دا څه پيوسته آبرو دي

چې هم نېش دي هم نشتر

دا څه سترگې دي قاتلې

چې هم سيف دی هم خنجر

دا څه شونډې دي مې گونې

چې هم مې دي هم شکر

دا څه سپين سپېڅلي غاښ دي

چې هم دُر دي هم گوهر

دا څه سېب زنخدان دی

چې هم سيم دی هم ثمر

دا څه قد او څه قامت دی

چې هم گل دی هم عرعر

دا څه ملا ده باريک وضع

چې هم موی دی هم مکر

دا څه زړه دی د خوبانو

چې هم موم دی هم حجر

دا څه يار دی نه پوهېږم

چې هم دل دی هم دلبر

دا څه بت دی زما ربه

چې هم بت دی هم بستر

دا څه شعر دی رحمانه

چې هم گنج دی هم هنر