دا ستا د يو ديدن په ارمانو راغلي دي

دا ستا د يو ديدن په ارمانو راغلي دي

دا واړه منفعل په بدو کړو راغلي دي

زما په ډکو سترگو کې کږلېچ ته دنظر

ستا در کې موسکي غشي د جلوو راغلي دي

ای درېغه که وی يو پکې مسلم خراساني

ټولي که درته ډېر د پښتنو راغلي دي

اوس بېرته ورته بويه د اسرارو دروازې

درشل پورې چې ستا د دروازو راغلي دي

زړگيه ديدن غواړې خو په شمېر کې يې! د چا؟

لږ شمېر کړه پتنگان د ديدن، څو راغلي دي

دنيا شوه دهغو هم يې برزخ هم يې جنت

په ځمکه په هوا که په اوبو راغلي دي

ناپوهه غرېوه، نشته دلته کار د زلزلو

واورونه اوس دنياز او اسوېلو راغلي دي

وختونه سرگردان مې په مطلب کې د رڼا

دي شپو ته ننواتې په جرگو راغلي دي

حمزه څومره به ښه وي په دې در چې شي قربان

دا اوښکې دي که دُر چې په شېبو راغلي دي