داغ د گفتگو مې لاله رويه په زړه نه شو

داغ د گفتگو مې لاله رويه په زړه نه شو

تا مې چې تپوس وکړ چې څه شو زړه مې ښه شو

ستا د مينې باد چې پرېشان کړمه نمر مخيه

اوس مې هر بڅری ستا د حسن د نور زړه شو

اوښکو مې جيلب ور سره وکړو نمک رنگه

څاڅکی د ارمان د وينې پاتې په باڼه شو

لا دې د ستم کړم ارماني ستم دې وکړو

ستا د بڼو غشي چې د زړه نه په واته شو

ای زما د زړه د وينو تږيه د يار ياده

خلاصې مې کړه اوښکې نور دې قرض په لېمه شو

ستا د تگ سره ور له جراءت د چيغې راغی

راز د زړه و ستا سره، چې ته لاړې په خوله شو

خپل ځان يې په "نه" کې و موندلی خبر نه و

ورک شو حمزه ورک شولو چې اوس د "ته"نه"زه" شو