دمور مينه

څو چې زمکه، اسمان او دنيا شته

دمور زړه کښې دمينې رڼا شته

که هېچا سره هېڅ ځای کښې نه وي

مور سره محبت بې ريا شته

د مور مينه د مينو مور بوله

که دې مينه په خور يا لالا شته

د ليلی محبت کښې هر گوره

دمور مينه دمينې تر شا شته

ټول عالم يې که بدگڼي مورې

په اولاد پېرزوينه د تا شته

ستا په مينه کې نقص نه پېښېږي

تا سره سرمايه د بقا شته

تا ته وي لکه تور ددوه سترگو

که دې غېږ کښې اولاد نابينا شته

ژوندون تا رابخښلي دي مورې

له ژوندونه نور څه شی اعلی شته

که زما په سروي دا ستا سيوری

نه حاجت دطوبی يا هما شته

ما اول دي و تاته ژړلی

بل ځای کله د چا د ژړا شته

جنت ستا دقدم لاندې دی مورې

تر دې لوړ مقام کله د چا شته