دوطن شهيد

څوک چې شهيد شي دخپل دين او د وطن د پاره

دجنت حورې ورته راشي د ديدن دپاره

دخدای له لوری ورته ډېر آفرينونه راوړي

پاس له آسمانه دملائکو سلامونه راوړي

د ده په مخ کې د شرابو ډک جامونه کښېږدی

دده له وينو پخپل مخ باندې خالونه کښېږدی

نه محوه کېږي په هيڅ شان دده د توری رڼا

د ده مړانه نه هېرېږي په هېڅ وخت کې د چا

ملالې نجونی په ډېر شوق دده مدفن لره ځي

لکه مين چې نيمه شپه ديارد بدن لره ځی

څوک يې په قبر باندې ږدی ښايسته گېډۍ دگلو

څوک يې بيرغ اوچتوی پخپلو سرومنگلو

قام او ملت ورته سلام او احترام استوی

دغه تحفه ورته په مينه هر ماښام استوی

په هسکه غاړه د جنت په مناروکې گرځي

په دې دنيا هم په هر وخت د خلقو زړوکې گرځي