دزمانې سندره

را سره دي لباسونه رنگ په رنگ

بدلوم کله جامې کله آهنگ

پېژندل زما پوره مهارت غواړي

هوښياري ده پيروي زما د رنگ

عادتونه بدلوم دانسانانو

په بل راز کړمه فکرونه دپوهانو

د آذربتان کړم مات په ابراهيم زه

ماتوم ښيښه دعقل په مستانو

يو کړم مست بل محتسب کړم بل هوښيار کړم

يو بډای کړم بل عالم کې کړمه بل خوار کړم

ورته گورم چې دوی څه کا يوله بله

ځکه يو د چا مزدور بل يې بادار کړم

زما کار دی چې تغيير پېښ کړم عالم کې

په افکارو په خويو د بنيادم کې

د ماغو کې نوی خيال پيدا کومه

جگړه جوړه کړم دعقل په حرم کې

کله زړونه کړم له توروکاڼو سخت زه

عاطفه کړمه پيدا پکې بل وخت زه

راسره تياره، رڼا، يخنی، گرمی شته

څوک راټيټ کړم ځيني کښېنوم په تخت زه

راسره دی حوادث پېښې بې شماره

په بل راز کړمه نقشې نوی کړم لاره

ورانوم زاړه کورونه زړې لارې

نوې لارې جوړوم نورو د پاره