گوره هسې کردگار دی رب زما

گوره هسې کردگار دی رب زما

چې صاحب د کل اختيار دی رب زما

همگي بزرگواران چې څوک يې وايي

تر همه وو بزرگوار دی رب زما

نه يې هېڅ حاجت په چا باندې موقوف دی

نه د هېچا منت بار دی رب زما

له نېستۍ يې د هستۍ صورت پيدا کړ

هسې رنگ پروردگار دی رب زما

هم صانع دی د جمله وو مصنوعاتو

هم سامع د هر گفتار دی رب زما

چې يې هېچرې نه مثل نه مثال شته

د هغو عطرو عطار دی رب زما

هر تعمير چې د دنيا او د عقبی دی

د همه واړو معمار دی رب زما

خواننده د نانويسو صحيفو دی

داننده د هر اسرار دی رب زما

که ظاهر دی که باطن دی که مابين دی

له همه وو خبردار دی رب زما

که پيدا که پوشيده دی که اوسط دی

په همه وو وقوف دار دی رب زما

شريک نه لري په خپله بادشاهي کې

بې شريکه شهريار دی رب زما

هسې نه چې واحدي يې ده له عجزه

په واحد وجود بسيار دی رب زما

حاجت نه لري د هيچا و يارۍ ته

له هغو سره چې يار دی رب زما

څه حاجت دی چې ويل خوا ته يې غواړم

په خپل کور کې همکنار دی رب زما

هېڅ تغير او تبديل نه لري رحمانه

تل تر تله برقرار دی رب زما