حق د بندگانو په خپل څښتن

د بنده په څښتن باندې

حق هم ډېر دی که يې کاندې

که خوراک وي که پوشاک وي

دا دواړه په ښه ژواک وي

چې نه وږي نه بربنډ وي

کار خدمت وته به غونډ وي

هسې کار دې باندې کېږي

چې يې توان ورته رسېږي

بېهوده که بد ويل کا

نه دې ده وته کنځل کا

که بد خوی که بد نهاد وي

بيا دې دی په مهر ښاد وي

هر خواجه چې عبد لرينه

دی دې تل شکر کوينه

چې خواجه دی بنده نه دی

نور عالم بنده دده دی

په مريونو چې ستم کا

هغه کس به خدای په غم کا