که همېش دې همنشين وي تور ماران

که همېش دې همنشين وي تور ماران

ښه دي دا، نه چې قرين وي بد کاران

هر چې ستا عيب تا و ته ښکاره کا

په جهان کې هم هغه گڼه ياران

په کردار کې يار، اغيار سره بېلېږي

تر يارانو ډېر لباس کا اغياران

د کمذات ياري به هيڅ وفا ونه کا

لا په تېره بې نمازان او می خواران

لکه تخم هسې بر، هسې يې بوټی

نه يې خوند مځکه بدل کا، نه باران

د زړه راز و چا ته نه ويلی بويه

چې دمځکې په مخ نشته راز داران

په قيامت به يو په يو واړه ځواب لي

که مېږي، ملخي پايمال که شهسواران

د خوشال باندې سلام بادشاه د وخت دی

په سپېرو ايرو لړلي خاکساران