که په فضل شي څه غم دی

که په فضل شي څه غم دی

که په عدل شي ماتم دی

له گناهه به خلاص نه وي

چې په نوم بني آدم دی

چې ظلوم، جهول يې ياد کړم

که پوهېږې ډېر کرم دی

په لاتقنطوا تکيه ده

که نه، اور ووري تورتم دی

زه هغه ناتوان ضعيف يم

چې مېږی تر ما محکم دی

په دا ضعف هغه بار وړم

چې ترې تښی درست عالم دی

که لويۍ وته مې گورې

مياشت و نمر زما پرچم دی

اسمانونه مې خيمې دي

پرې د ستوريو زينت تم دی

لا مې لوی باغونه نور دي

کمکی باغ مې د ارم دی

غم مې هيڅ نشته خوشال يم

که خپل بخت راسره سم دی