که په خوله راسره جنگ کا هغه يار

که په خوله راسره جنگ کا هغه يار

په زړه مهر رنگا رنگ کا هغه يار

چې له ما سره راځي غاړه غړۍ

چې مې لرې له زړه زنگ کا هغه يار

هيڅ حاجت د تورې نشته ماڼې بس دي

که مې مرگ و ته اهنگ کا هغه يار

چې مشال يې د جمال راته ښکاره کړ

بيا به ما باندې پتنگ کا هغه يار

چې ملنگ د مصلی غواړي خپل مخ ته

عاقبت مې په ملنگ کا هغه يار

د هر چا سره خندا په ارت زړه کا

خو په ما باندې زړه تنگ کا هغه يار

مرصع بېسر دې نور لري په پوزه

اکتفا په تور لونگ کا هغه يار

زه فقير يم، دی بادشاه دی، باندې ښايي

که زما له يارۍ ننگ کا هغه يار

رقيبانو وته نرم شي تر مومه

و خوشال و ته زړه سنگ کا هغه يار