خدای زده نن ړوند او که بينا شومه زه

خدای زده نن ړوند او که بينا شومه زه

چې د عالم په تماشا شومه زه

غمه په تېره دې ارمان کومه

د خوشحالۍ سره اشنا شومه زه

تا د ژړا چې مې تپوس وکړو

له ډېره سوخته په خندا شومه زه

ته چې نفرت کوې زما نه په څه

وايه په تا ولې شيدا شومه زه

خلکو به وې خو زه مېن نه ومه

څنگه دروغ وو چې رښتيا شومه زه

دومره طاقت و د پرواز څه پکار

عشقه اوس څه شوې چې عنقا شومه زه

شوم زه حمزه چې ستا دسترگو قتيل

پوی په انداز د مسيحا شومه زه