کوم چې حجاب و د چشمان، څيرې شو

کوم چې حجاب و د چشمان، څيرې شو

لاړو دفتر مې د ارمان څيرې شو

مشت و گرېوان مې ضبط د شوقه سره

پکې گرېوان مې د ارمان څيرې شو

هلته سحر زما په غم و خندل

دلته مې گل غوندې گرېوان څيرې شو

نن خو بڼو ستنو گنډل کول ستا

وايه زما ولې گرېوان څيرې شو

ولوله واخله افسانه مې ده خو

هغه ورق يې د عنوان څيرې شو

چرته قاصد مې د اشنا نه وي دا

دا غبار څنگه د کاروان څيرې شو

چې په اغزو کې د بڼو ونښتې

نظره خير که دې دامان څيرې شو

چغه به هلته ته زما واورې

چا که خبر کړې چې اسمان څيرې شو

راغله رڼا د تصور يې حمزه

نن مې گرېوان د شبستان څيرې شو