لسم فصل - په بيان د ښکار کولو د نورو مرغانو په باز باندې

د باز ښکار خو مرغابۍ ده که يې گورې

بيا سونا ښايسته غاړه سترگې تورې

زر که هم په الوتلو تقصير نه کا

باز چې ځان ورپسې جوړ کا نفير نه کا

تور تاور چې ښه قنديل شي هم بد نه دی

چې يې واخلي باز نشاط و کا ډېر ښه دی

ننداره که د تمځري هر څو ښه ده

يا جره دی د تمځري يا باښه ده

د تمځري کوردې وران شي باز په ځان کا

په هر بوټي يې وهي پرونه يې وران کا

چې بټېری نيسي ښې نيسي سيسۍ يې

تېز پري د باز په دا ده نور کسۍ يې

په مير ښکار به په تمځري تلوار نه کا

ځان چې ساز کا يا به ساز پسې مرغه کا

که د باز مزاج د ځاړې دی مير ښکاره

اما بند د پښې يې وباسي له کاره

چوز و باز وته اسان گڼه تر څاړي

ښه بازونه چوز هيلۍ غوندې رانغاړي

د سرخاب نيول جره لره هنر دی

تر هيليې لا و باز وته بهتر دی

قاز کلنگ چې څوک په باز نيسي ستم کا

ښه شېرين شېرين بازونه په الم کا

يکساله طاوس هم ښه دی څنگ يې نه وي

چې آزار د باز د پرونو د جنگ نه وي

که په باز باندې دې سويې نيول بويه

تريناک لره بدي نه لري سويه

تريناک سره چل ول وي د نيولو

چوز لا ورو ورو پرې حملې کا د وهلو

تريناک بوزم تولک تر چوز بهتر دی

بد خود دا چې ښه کوريز نه خوري شوخ پر دی