لېوني شول پښتانه په منصبونو

لېوني شول پښتانه په منصبونو

خدايه! ما ژغورې له هسې غضبونو

د کنگاش علم د چا دی د تورزنو

لکه څوک لولي قرآن په مکتبونو

د کنگاش له علمه هيڅوک خبر نه دي

خبردار يم د هر چا په مشربونو

پښتانه لره لوی عيب دی که يې گورې

چې نازېږي د مغول په لقبونو

شرم، ننگ، نام و ناموس يې په ياد نه دي

خو ويل کا د منصب، د ذهبونو

د مغول سره ليده په تمه مه کړه!

که کېدای چېرې په نورو سببونو

خټک واله بلنځه ښه زما تر ملا ده

نه ښيوه د نوکرۍ په قصبونو

د پادشاه د زندان شپې زما په ياد دي

چې تمامه شپه مې تله په ياربونو

پښتانه که جنگ مغول سره په تېغ کا

هر خټک نيوی مغول تر جلبونو

د خټک د ننگ جرگه نشته خوشاله!

راوتلي دي له کومو نسبونو