ملی قدرت

په رښتيا هغه ملت وي بختور

چې لري ملي نظام ملي رهبر

وي اصلي حاکميت د خلکو لاس کښې

حکومت وي د ملي قدرت مظهر

جامعه پخپله وي په ځان حاکمه

د عامه افکارو وي قوي اثر

نه تبعيض نه امتياز وي نه تېري

په حقوقو کښې وي خلک برابر

د هرچا اعتماد وي په عدالت

قوانين وي له هر چا نه معتبر

آزادي ديموکراسي وي واقعي

خطر نه وي کرامت ته د بشر

مخور مسلط نه وي په نظام

اهليت او لياقت وي مخور

سر او مال وي په امان فکر او نظر هم

زورور چې پکښې نه وي پخپل سر