نن نگار و ماته راکړ د يارۍ خط

نن نگار و ماته راکړ د يارۍ خط

وې يې واخله دا مې دی دلدارۍ خط

د غماز له دو راهيه ترهه وکړه

ځای به بايلې د مکار په جوارۍ خط

چېرې نه وي چې يې څيرې په غفلت کړي

تل يې لوله په تميز په هوښيارۍ خط

په مدت سره به ستا انجام ته رسي

اسان کله دی دا ستا د ريبارۍ خط

د غفلت له خوبه پاڅه بيداري کړه

تل و تاته سپارلی د بيدارۍ خط؟

برابر د خط په حکم قدم کېږده

که ته غواړې په عقبی د نامدارۍ خط

له ميزانه که امان غواړې رحمانه!

تل خو لوله په ډېر عجز په زارۍ خط