نور به مخ په آيينه برابر نه کړم

نور به مخ په آيينه برابر نه کړم

نه به دواړه سترگې تورې په رانجه کړم

نه به سپين لاسونه سره کړم په نکريزو

نه به نور په ږمنځ ساز د سر وېښته کړم

نه به ماتې ماتې څڼې په مخ پرېږدم

نه به لاندې باندې لب په پانو سره کړم

چې دمينې يار مې نشته، چې مې گوري

د صورت سينگار و کوم يوه ته وکړم

درست صورت مې سرې لمبې شي، شنې ډډوزې

چې دخپل مين د مينې راز تر زړه کړم

که ژوندون تر هر څه خوږ دی په جهان کې

اوس بې ياره په ما تريخ شو زه يې څه کړم

هغه يار چې چېرته دی خوشال دې اوسي

دی دې خپله خوشحالي کا، غم به زه کړم