په مینه، مینه که یو بل ته غېږې واکړو

په دې ورکه دنیا کې په اخر سره پیداکړو

پر جنګ به تیږه کېږدو، جنګ به مړو سترګو ته پرېږدو

راځه چې له شاهین سره کوترې په هوا کړو

لیلا چې کوم خوا سترګې غړوي مجنون به ویني

او ډکه له لیلا نه به څلور کونجه دنیا کړو

منصور به په ګلابو په نرګسو باندې ولو

دحق پر ضد باطله به دهر ملا فتوا کړو

دا توره وچکالي به یې په سپینو اوښکو مینځو

له ډېرې خوشحالۍ نه به بلبلې په ژړاکړو

شپې ورځې د ژوندون به مو خوشبو کې وي رانغښتې

لمونځونه د سحر به په ګلونو کې ادا کړو

روان به شو کاروانه دبڼو پر څوکو څوکو

رانجه به د جانان له خماري سترګونه غلاکړو