په ظاهر صورت چې ستا د در گدای دی

په ظاهر صورت چې ستا د در گدای دی

په معنی کې دجمله جهان کد خدای دی

مجنون بيد غوندې رونق د گلستان شي

چې يې ستا له غمه سر په پشت پای دی

چې له غمه دې جرس غوندې نالان دی

د جمله وو گمراهانو راهنمای دی

چې څوک زړه د ستا وتورو سترگو ورکا

ستا د وروځو تر محراب لاندې يې ځای دی

چې مسکن يې د زړه ستا د زلفو خم شي

دهغو ناستی په سيوري د همای دی

چې تا وويني و ماته نصيحت کا

شک پرې مه کوه بېشکه چې خودرای دی

که زردار دي اشنايان د زردارانو

د رحمان داشنايانو تکيه خدای دی