پل صراط - دسکندرسد

د ايمان د خاوندانو دا باور دی

چې يو پول په سمه لار کښې دمحشر دی

بدان نه شي تېرېد لای ترې هېڅکله

د نېکانو صالحانو پرې گذر دی

ورنه تېر شي څوک چې ځای لرې جنت کښې

ورنه لوېږي چې اصلي ځای يې سقر دی

که پوهېږی دغه پول شته په دنيا کښې

خو عالم لږ څه غافل او بې خبر دی

په صراط المستقيم باندې تل گران دی

د جنت په لوري تگ مشکل سفر دی

تېرېدل له هوسونو اسان نه دی

بوالهوس ته دغه سد د سکندر دی

له نفسي خواهش نه هغه تېرېدای شي

چې د نفس په خواهشاتو زورور دی

په شهواتو چې قدم ږدي او تېرېږي

همدغه پول د صراط او د محشر دی

په دې لار کښې لوږې تندی سر بايلل شته

حق د پاره سرو اورونو ته لوېدل شته