قدر او مقدار

د چا فخر د سيسۍ، زرکې په ښکار

د بل فخر په وژلو د ښامار

د وړوکی کار وړوکی د لوی لوی

دهر چا قدر دخپل کار په مقدار

دعقاب پرواز ته گوره چرگ ته گوره

چرچرک چېرته او چېرته موسيقار

چا سره نقشه وړه چا سره لويه

يو به خونه جوړوي بل به لوی ښار

څوک سينگار کوي څوک کار کوي څوک لوبي

ملتونه جوړوي ملي معمار

عادي خلک به کوي عادي کارونه

نوابغ لري په کار کښې ابتکار

دتاريخ جبرکوي لوی لوی حکمونه

څه راوزي جريده کښې د روزگار

ډېره لويه غېږ په کار ده مستقبل ته

لوی جريان کښې يې چې ښکاري څه آثار

زړونه داسې گواهی لي چې هرگوره

نوی نوی څه راوړي ليل و نهار

لوی بدلون دی را روان په دغه لوری

وڅاری د شپولو او ورځو لويه لار

ډېر څه وړي ډېر څه راوړي انقلابونه

نه پرېږدي يوسړی خورد او بل خروار

ولسي نظام هر څه خلکو ته سپاري

هم د کار مسؤليت هم اقتدار

مساوات نشی راتلی څو چې هېواد نه

باداري آغايی کډه نکړي بار

چې پيدا شي اطمينان خوښی په زړو کښې

نيسي ځای دخلکو زړونو کښې سرکار

بدبينی بدگماني غلط فهمي

نه وي خلکو کښې چې خلک وي اميدوار

ژوندي کېږي اميدونه اسرې هيلې

په افسون دمحبت په ښه کردار

علاقه نظر هغسې نه جلبېږي

لکه څوک چې جلبوي علاقدار

نه په چل باندې کېدی شي نه په جبر

څه چې کاندی شخصيت د يو کردار

زړه چې ښه شي په ښه زړه بيا هر څه کېږي

هغه کېږي چې نه کېږي په اجبار