راته څه وايې چې يار در سره څه کا

راته څه وايې چې يار در سره څه کا

که وفا کا، که جفا کا واړه ښه کا

دا تل دود د ښايسته و د يارۍ دی

چې يک لخته د زړه مهر په چا نه کا

سل بلا يې قبلوه، ورپسې درومه

ښايسته د جهان کل واړه خپل زړه کا

چې دکبر خيال، دماغ و ته يې گورم

اندېښنې مې ويښ بيدار ورته اوده کا

که په نه عمر يې نه گڼم زه خوار شم

هغه عمر چې جدا له ياره تله کا

تېره چار به د هېچا په لاس رانه شي

که په ډېره ژړا سره دواړه لېمه کا

کله زخم دماڼي ورباندې کېږدي

کله بيا دارو د زړه په سپينه خوله کا

د بتانو په ديدن د زړه نشاط شي

لکه باغ پاڼې گلونه په اوبه کا

په د رتللو يې شړې په تلو يې بولې

چې يې نه پرېږدې په هيڅ کې خوشال څه کا