شته په هر طرف کې زمونږ پام د بېنوا

شته په هر طرف کې زمونږ پام د بېنوا

ويړ په شش جهت کې وينم دام د بېنوا

جام به د سامان دده محفل کې په گردش شي

چا چې شونډې کېښودې په جام د بېنوا

خوند د بادشهۍ به يې سبب د انقباض وي

څوک چې له اخلاصه شي غلام د بېنوا

موسکه مې دنيا دبو تراب (رض) په تصور ده

زيات به له دې نور څه وي اکرام د بېنوا

خلاص يې کړم د ډېرو سلامونو نه په ژوند کې

يو کرت چې ما وکړو سلام د بېنوا

دا د زړه پولۍ مې هره زړه ده په معنی کې

ښکاري چې برپا دی پرې خيام د بېنوا

راشه د حمزه د هر وېښته نه يې ونغوېږه

غواړې که طالبه څه کلام د بېنوا