څوک خبر دي له فتنو ددې جهانه

څوک خبر دي له فتنو ددې جهانه

نوې نوې را پيدا شي له دورانه

ما و تا غوندې به څو باد وړي ياد کا

که خبر واخلې له مځکې له اسمانه

چې له باده دمه ډک وو که يې گورې

باد يې خاوره په ملکونو کړه پرېشانه

په شان، شان مې د وجود ننداره وکړه

بيا به هم شي په څو رنگه، په څو شانه

نه يې زر، نه جواهر شته يو تاوان دی

که به ښه کړې، ځان يې خلاص کړه له تاوانه

زمانه مې شوه په غاړه ای خوشاله!

که يې گورې نه له تا نه، نه له مانه