تاته به ښه نه ښکاري چې زه وايم

تاته به ښه نه ښکاري چې زه وايم

ماته خو ډېر ښه ښکاري چې څه وايم

داسې جامعه نشته چې ورشمه

څه مې چې په زړه وي هغه ووايم

نه کېږي د پښتنې دضمير نه کېږي

بيا به هم څه وايم که څه نه وايم

کومی د وجدان دې په دې تريخ مه شه

زه خو حق پسند يمه خواږه وايم

څه وکړم چې لاس راته په خوله کښېږدي

خود چې څه په زړه وي په لېمه وايم

ما وې پښتانه باڼه به ټيټ نه شي

اوس ورته هندکۍ که پښتانه وايم

بيا يې سباگوره چې ډېر سم به وي

نن دې خلق وايي چې کاږه وايم

تل به په وينا کې نوی شان لرم

گوره يې بيا بيا که زه زاړه وايم

تلونکي دې يادونه دي که ډېر دي څه

زه حمزه هغو ته مېلمانه وايم