تاييد عشق!

اوريدلی مې دا نقل په دا باب دی

چې مريد وته يو پير کړی جواب دی

وې يې ورشه شېرشاهي په مينه من شه

هله رايشه داخل په انجمن شه

چې خاطر له يوه داغه بې فروغ وي

که هزار ځله رښتيا که په دروغ وي

خواه ناخواه په يوه څيز يا په څه تيږه

خوږ خاطر شه آه فرياد کوه عزيزه

هنگامه بويه د زړه په مينه گرمه

خدای دې نه کاندي سړی بې خپله درمه

سړی هله شي سړی چې آشفته شي

شگوفه کا، هله بوی چې شگفته شي

سر درد د عاشقۍ تاج و افسر دی

چې يې دا افسر په سر مهم يې سر دی

له دې سره مه شه سر دچا بې سرو

په دا سرو دی يو سر بهتر تر زرو

سر له سره خالي مه شه، چې خالي شي

چې مثال دخټو خټ لا و بالي شي

په وربشو په کار نه دی سلامت سر

سلامت دې وي په مينه ملامت سر

درد و غم دمحبت دارو درمان دی

د جهان د کارخاني خان و سامان دی

دين دنيا حلقه په گوش ددې حلقې دی

شاه گدا حلقه بگوش ددې حلقې دي

وي دې تل زما حميد په غاړه غوږ

دا د عشق حلقه دده دزوږ