تازه په ما هر گړۍ د عشق چپې راځي

تازه په ما هر گړۍ د عشق چپې راځي

نوی اميد لره زما د غم غوپې راځي

شاهباز د جهر به وهل وي په رباب د مينې

گنې نو ما له هم د غم سوې ټپې راځي

واعظه رشک مه کوه زه که شبخېزي کومه

گوره قسمت کنه! په شپو کې کله شپې راځي

رباط د درد او د الم دی که زړگی دی زما

چې پرې د هر طرفه تل د غم جوپې راځي

زما ديوان به د غزل تازه بچې کړي پيدا

تر هغه پورې چې په ده وخت د چاپې راځي

وحشت يې زېری په اغزو کړو چې تېرې کړئ څوکې

ستاسو دعوت لره حمزه پښې ابلې پښې راځي