توره، پښتو، پښتنواله

عبادت په توره خدای ته زيات له هر راز عبادت دی

تويول د وينو وروره! خدای د پاره لوی طاعت دی

که جنت د چاپکار وي تورې لاندې يې مقام دی

نور به څه وايم چې څه دی؟ مرگ و ژوند د يوه قام دی

ټول دتورې په رڼا کښې خپل مقصد ته رسېدلی

ډېر تختونه ډېر تاجونه تورې يوبل ته بښلې

ترقی و اعتلا څوک

که دقام اوملت غواړی

په وطن او په هېواد کې

که ښه نوم او عزت غواړی

يا د دين او دنيا گټه

يا له خدايه جنت غواړی

ټول په توره گټل کېږي

خو ټينگ عزم و همت غواړي

په دنياکښې چې تېر شوی

تردې وخته فاتحان دی

سکندر که ناپليون دی

که مغل او که غوريان دی

شاه محمود که احمدشاه دی

عزنويان اوکه سوريان دی

له مشرقه تر مغربه

چې هر څه جهانگيران دی

ښه خبر شه زما وروره

ددې عصر له احواله

بې له زوره په دنيا کښې

زندگي شوله محاله

ضعيفان خلاصېدای نه شي

د فرېب مکر له جاله

بې له تورې خلاصی نشته

ظالمانو له جنجاله