څه غواړم

نه سره او سپين نه ښې ماڼۍ نه مهرويان غواړمه

د احمدشاه شېرشاه ميرويس غوندې افغان غواړمه

زه دې جهان کې نه قصرونه نه باغونه غواړم

چې د پښتون حقوق مني هغه جهان غواړمه

نور زه بې برخې خوار و زار پښتون ليدلی نشم

دغه شان نه بل شان دورونه د آسمان غواړمه

ځان ته څه نه غواړم حرام شه که به هيڅ وغواړم

د قام دپاره يو آزاد پښتونستان غواړمه

چې يې له ويرې فرعونان بد بد خوبونه ويني

له پښتنو ميندو نه هسې ماشومان غواړمه

د تيرا غرو کې تجلی د کوه طور چې گوری

صاحب نظره پښتانه د قام مشران غواړمه

چې مغلواله نه مني او رنگ غلام گڼي خپل

مومندو تاسې نه حميد، عبدالرحمن غواړمه

چې پښتنو ته د غيرت او ننگ سندرې وايي

زه له خټکو نه هماغه خوشحال خان غواړمه

د پښتنو د سردارانو وزيرانو ځنې

زه فتح خان و ايوب خان او اکبرخان غواړمه

چې طلسمونه د فرنگ سرحد د ظلم کړي مات

هغه قوت هغه طاقت هغه ايمان غواړمه

واړه سوالونه نه کوم له لويه خدايه ځنې

له لويه خدايه لوی پښتون او لوی افغان غواړمه