څه غواړو

چې په عالم کښې د نفاق اورونه نه بلوي

په اتفاق باندې راضي وي فسادنه جوړوي

د انسانانو تر منځ خير غواړي او خيرلټوي

چراغ د داسې خان ملک بل تر سبا غواړو مونږ

چې د ريا په طاعتونو خلق نه غولوي

په بزرگۍ او مسايلو کښې نه ټولوي

صحيح اسلام هر چاته ښيي حق باطل بېلوي

دا رنگه پيرشيخ و ملا دقوم پيشوا غوړو مونږ

چې رشوت نه خوري ظلم نه کړي او پوهېږي په کار

خوشی په خوشی نه کنځل او نه وهل کړي نه قار

په خوار غريب لری زړه سوی لکه په ظلم او بدکار

هغه قاضي هغه حاکم هغه ميرزا غواړو مونږ

دملايانو په تعويذ وی که په دم د فقير

د ډاکټرانو په دوا وي که د طب په اکسير

په خيراتونو په ټوټکووي يا په بل کوم تدبير

له لويه خدايه خپل مريض لره شفا غواړو مونږ

چې خدمت کاندی په رښتيا ملک و ملت د پاره

په حق چلېږي د انصاف او عدالت د پاره

په سمه لاره وي روان د حقيقت د پاره

دا راز ښه توب ښه سړيتوب بې له ريا غواړو مونږ

چې دماغونو کښې رڼا زړو کښې سرور پيدا کړي

قوم وملت کښې دلوړتيا ذوق و شعور پيدا کړي

فکر و عمل او اخلاق ښه کړي ښه دستور پيدا کړي

له مکتبونو علم و پوهه د رښتيا غواړو مونږ