څه جوړ شوه؟

زما د آه له حرارته دوزخونه جوړ شوه

له تور لوگی نه يې دا پورته آسمانونه جوړ شوه

اوښکی له سترگو او خولې زما له وچولې نه

چې تويې شوې دخدای په لار کښې جنتونه جوړ شوه

چې سر مې ټيټ کړ خپل گرېوان ته دمعنا په لټون

له يوه څاڅکی راته لوی لوی دريابونه جوړ شوه

لکه غواص چې شوم غوټه د معرفت په قلزم

هرې قطرې نه بې حسابه گوهرونه جوړ شوه

د زړگي سترگې مې کړې خلاصې د جانان په لوری

شعور بينا شو ذوق پيدا شو او شعرونه جوړ شوه

چې آبادۍ ته مې کړه مخه ټول جهان شو گلزار

له سپېرو خاورو ښايسته ښکلی ښارونه جوړ شوه

سره او سپين ماچې په نظر د محبت وليدل

ښکلو ته هار او پادشاهانو ته تاجونه جوړ شوه

مونږ کړه له خاورونه راپورته زر په خاورو کښې و

زرو د پاره ولې مونږ څخه مريو نه جوړ شوه

وهم او خيال مې په مغزو کښې محکم ځای ونيوه

تصوراتو نه آخر کښې تصديقونه جوړ شوه

له خپله لاسه بتان جوړ کړم بندگي يې کوم

باطل خدايان راته دوهم له مضمونه جوړ شوه

نه وم خبر چې څه کوم د څه مقصد د پاره

رانه په لوبوکښې اتوم څه بمونه جوړ شوه