څه کېږو؟

اسرې هيلې اميدونه لرو زړه کښې

خو هېڅ نکړو تشه طمع کښې اوسېږو

ډېر مين په آزادۍ دموکراسۍ يو

چې ډېر لږ ورته نږدې شوترې ويرېږو

نور څه نه وينو بس وينو ښه خوبونه

په واده د خوب خونه پلرونه کېږو

دا چې مونږ هر څه کوو زمونږ کار نه دی

خدایخبر دی چې د چا لاس کښې لوبېږو

ډېر ساړه او ډېر تاوده شو يوه آن کښې

په يوه پوکي تودېږو او سړيږو

ته خپل کارپه بې غمۍ کوه رقيبه!

مونږ پخپلو کښې ډېر وران يو نه جوړېږو

فرېبونه راکوه نور څه رانکړې

که سل ځله وغولېږو بيا غولېږو

زوروره! ستا چاړه زمونږه غاړه

د قانون په حکومت مونږ نه پوهېږو

دوه قدمه که په مخ ځو درې په څټ ځو

په دارنگه تگ کوم ځای ته نه رسېږو

ماشومان دی چې لوړېږي کال په کال

مونږ زاړه ، هرکال له بل کاله ټيټېږو