اندېښنو ته زړه ورمه کړه

اندېښنو ته زړه ورمه کړه

څو حيات يې په دنيا

که تل خوښ اوسې تل خاندې

يې اسم يا مسما

تر هغه نادان څوک نشته

چې نن غم خوري د سبا

غم غيرت په يوه لور کړه

خاطر صاف شه له هرچا

د سبا اندوه نن مه کړه

گوره څه وشي فردا

واړه وسپاره و خدای ته

که دوستان ديکه اعدا

که لقمان شې په حکمت کې

يا که بو علي سينا

نه به لار د مرگي بند کړې

نه به خلاص شې له قضا

د قضا سره جنگ نه شي

و قضا وروړه رضا

که رضا په قضا ورکړې

نور خوشال يې په رښتيا