هر خاطر چې ناقرار شي

هر خاطر چې ناقرار شي

قراري يې په ديدار شي

چې خپل زړه و چاته ورکا

هغه څه په خوارۍ خوار شي

هسې سيند لرم د سترگو

چې جمنا ورته رود بار شي

يو څه راز لرم په زړه کې

هيڅوک نشته چې راز دار شي

هسې ژاړم له بېلتونه

چې غليم راسره يار شي

زه هم عار لرم له خلقه

که دخلقو له ما عار شي

واوېلا علاج يې څه کړم

پرهارونه په پرهار شي

هومره ډېر پيران ، شېخان دي

نشته يو چې مددگار شي

د سړو سړو آهونو

کمی نشته که څه کار شي

په ديدن د ښو يارانو

ډېر غمونه تار په تار شي

په بېلتون د خنده رويو

د خوشال ژړا آزار شي