هر ساعت چې په چا ځي هسې بېکار

هر ساعت چې په چا ځي هسې بېکار

تر هغه نه زه لا ښه گڼم بېگار

رنځوران که کاروبار نه کا معذور دي

روغ سړي به ولې نه کا خپل روزگار

که هيڅ کاروبار دې نه وي درته وايم

هسې مه کښېنه بې کاره، نا په کار

په هرڅه چې غم غلط شي، واړه ذوق دی

که په نرد، که په شطرنج وي که په ښکار

سړی هر ساعت هر وخت په بل بل حال شي

همېشه په يوه حال دی کردگار

ستا به نوم په جهان پاتې شي خوشاله!

يوه لويه مشغولا ده ستا د کار