هوښيار مه گڼه هوښيار ددې دنيا

هوښيار مه گڼه هوښيار ددې دنيا

بې وقوف دی وقوف دار ددې دنيا

روښنايي په هغو زړونو ده حرامه

چې پرې کښېني گرد غبار ددې دنيا

پوچ گويې ده چې يې اهل د دنيا کا

هر کلام او هر گفتار ددې دنيا

د طفلانو په څېر واړه خاکبازي کا

هر چې کاندي کاروبار ددې دنيا

واړه ډکې خولې د پيو هلکان دي

کار ديده او پخته کار ددې دنيا

همېشه به يې وقوف او بې شعور وي

چې مخمور وي په خمار ددې دنيا

د شرابو هم لا هومره مستي نه وي

لکه مست وي خمر خوار ددې دنيا

هر بيمار لره دارو په جهان شته دي

دارو نه لري بيمار ددې دنيا

د هر سوي علاج وشي په جهان کې

مگر سوی په شرار ددې دنيا

هر چې اچوې و اور ته واړه سوځي

موړ به نه شي طلبگار ددې دنيا

گرفتار يې همېشه په غم کې ډوب وي

هېڅوک مه شه گرفتار ددې دنيا

تل به پروت وي په ظلمت او په تور تم کې

چې اسير وي په کفار ددې دنيا

څه و بت وته سجده څه و دنيا ته

بت پرست دی پرستار ددې دنيا

په مسلمو کې خاصه مسلم هغه دی

چې يې وشلاوه زنار ددې دنيا

تن يې پاتو شي بې سره، سر يې لاړ شي

سردار کله دی سردار ددې دنيا

زويه لوڼه يتيمان کا ځنې درومي

بې وفا دي مور او پلار ددې دنيا

همېشه به يې يو پنډ د غم په سر وي

چې په سر يې وي دستار ددې دنيا

واړه غم دی که يې پيرې يا يې پلوري

نور څه نشته په بازار ددې دنيا

همگي واړه ټگان دي ټگي کاندي

فروشنده او خريدار ددې دنيا

په دنيا به مينه نه کاندي هېچرې

چې خبر وي په اضرار ددې دنيا

چې نظر د چا په دين او په ايمان وي

هغه نه کا انتظار ددې دنيا

چې وېرېږي له کوهي او له گړنگه

هغه نه درومي په لار ددې دنيا

هر سړي لره چې ور شي ځنې درومي

ما ليدلی دی رفتار ددې دنيا

اشنايان يې همه واړه اغياران دي

يار دی چرې په ديار ددې دنيا

چې پيدا شي همگي واړه فنا شي

راشه وگوره ناتار ددې دنيا

په يوه گړۍ بهار وي بيا خزان شي

بقا نه لري بهار ددې دنيا

که هزار هزار پشتيه ورته کېږدې

بې بنياده دی دېوار ددې دنيا

که د اوسپنو حصار تر ځان چاپېر کړې

ښيښه وگڼه حصار ددې دنيا

لکه سيوری د آفتاب په مخ کې گرځي

نشته هېچرې قرار ددې دنيا

هېڅ گومان د بهتريه پرې ومه کړه

کهتري ده وار په وار ددې دنيا

بې مقراضه غوڅوي د سړي عمر

هم دا ليل او هم نهار ددې دنيا

پس له مرگه به حساب د سړي غوښت شي

په انداز او په مقدار ددې دنيا

عقابت خو به يوموټی شي د خاورو

گلعذار او گل رخسار ددې دنيا

برابر به له گدايه سره پاڅي

شهزاده او شهريار ددې دنيا

پاس به داغ وي د لئيم په سينه باندې

هر درهم او هر دينار ددې دنيا

د قانع تر قناعته صدقه شه

هم دنيا هم دنيادار ددې دنيا

پس له مرگه به همه واړه مظلوم وي

ظالمان او ستمگار ددې دنيا

تر قيامت به دغه شل او دغه لس وي

پوره نه کړ هېچا شمار ددې دنيا

چې ايام پرې د کفن د غسل ورشي

بې پردې شي پرده دار ددې دنيا

په تخته باندې بېرون شي له حجابه

شرمناک او شرمسار ددې دنيا

تر هر چا به پيغمبر څخه وه ډېره

که څه قرب وی يا وقار ددې دنيا

يو فساد به يې بيان په رحمان نه شي

فسادونه دي بسيار ددې دنيا