چې يې هسې لايعقل لاړم په شومي

چې يې هسې لايعقل لاړم په شومي

دا پياله د چا له لاسه ده، څه نومي

خدايه! څه دې يو باد وړی زړگی راکړ

چې همېش د عشق د باد په مخ کې درومي

په دا هم لا رقيبان کا په ما رخه

چېمې زړه د يار په ياد و راحت مومي

ما لا حرف نه و له ياره بدل کړی

د سحر خرس دې ووېشت شي په کومي

بېلتانه زما په قصد چاړه تېره کړه

د قصاب دلسوزي نه شي په ورغومي

واړه دوک مې د اشنا دبېلتانه دی

په دروغه سر تړم بهانه د دومي

چې يې بې له ده بل خيال نشته په زړه کې

دخوشال دلبره کومه ده، څه نومي