د ښايست سره سل نورې چارې بويه

د ښايست سره سل نورې چارې بويه

چې عاشق په ځان مين کاندې مهرويه

تل د مښکو بوی روان په بستر نه وي

درېغه، درېغه د مهرويو گفتگويه

عاشق يو لکه لېوه په شمال پايي

بل په غټو سترگو خوب کا لکه سويه

په سبا پسې يې مرم، نه سبا کېږي

د هجران شپه يې په ما شوه ترکال لويه

زما دواړه سترگې جوی، ته سبر قد يې

سبر ونه جدا ښه نه ده له جويه

اوس د جونو هوس مه کوه خوشاله

پښتنې جونه ترهېږي له دوه مويه