که منصور غوندې کافر د محبت شې

که منصور غوندې کافر د محبت شې

ته به هاله مستقيم په شريعت شې

د هوښيارو مجالس به درته هيڅ شي

که د عشق د لېونيو په صحبت شې

د جهان خواږه به تا وته ترخه شي

که خبر د يار د مينې په لذت شې

فراغت به دې هاله و زړه ته دېرشي

که له خلکو کناره، کونج و خلوت شې

دجهان په خزانو به دې خندا شي

که تونگر په خزانو د قناعت شې

که نظر د کېميا گر درباندې وشي

که ته خاورې يې تر زرو به قيمت شې

د بې آبې مرغلې هيڅ قيمت وي

په زېبا سيرت به قدر د صورت شې

ای خوشاله بتخانې دي زړې ډونډې

خليلي ناره پرې وکړه په همت شې