ابتکار

فراخۍ کښې خوشحالي مبتذل کار دی

په تنگسه کښې چې وي خوښ دا ابتکار دی

ناوې خوښه په ډولۍ کښې ده هر گوره

رقاصې لره پراخ ميدان په کاردی

يو چپن کښې بل په کوټ پتلون کښې خوښ وي

ځوان د پېغلې زوړ د کونډې خريدار دی

ديارغېږ کښې که وي هرڅو فشارونه

په همداسی مضيقه کښې خوښ دلدار دی

کوټنۍ کښې زاهد خوښ په رياضت دی

عيش عشرت څخه بېزاره پرهېز گاردي

مجاهد د حق د لارې هر څوک وي

د خليل په شانی خوښ په سره انگار دي

د کوگل په تنگ قفس کښې زړونه خوښ دي

چې لاس تنگ شي نو د گېډې عمر خوار دي

گېډوخوښ وي د کندو خولې ته چې گوري

مين گوره ! خوښ په تنگه خوله د يار دي