اے باد سبا

تۀ څۀ خبر اے باد سبا

څۀ دُنياگانې تالا کړې مونږ

هېرې مې کړې زلفې خورې ورې

زلفې جانانې تالا کړې مونږ

هېر مې که هغه د نور سبا

هېر مستانه لېونے ماښام

هېر مې کوکۍ مينه ناکې کړې

پروت دې اړولې دميو جام

ډکې ډکې ځولۍ د نور

څۀ په خندا مونږ نوستلې دی

سرې صراحۍ د رڼا او ساز

مونږ په صحرا اړولې دی

سترگې چې وې د خُمار ډکې

مستی د ژوند د شرنگار ډکې

پور د شرابو پيالۍ د ناز

ښکلې د سُر او سينگار ډکې

روکې شوې، هېرې شوې، خاورې شوې

ياد او ارمان ئې هم خاورې شوې

پاڼې، گلاب او غوټۍ څۀ کړې

غم د خزان ئې هم خاورې شوې

تۀ څۀ خبر ئې اے باد سبا

څۀ دُنياگانې تالا کړې مونږ؟

هېرې مې کړې زلفې خورې ورې

شونډې جانانې تا لا کړې مونږ