بې چله اوناچله

دلته کله څوک چلېږي بې څه چله

دې بازار کښې خو بې چله دی ناچله

دا هم چل دی چې خرپلار کړه خپله چار کړه

پلار گلوي مې ددې خلکو وليدله

سياست په دې چل ډېر ښه پوهېدلی

چې خپل ظلم عدل وښيی هرکله

چل دانه دی چې هر چا ته چل ښکاره شي

چل هغه دی چې چل نه ښکاري هېڅ کله

چل يې نزده چې په چل دی مشهور شوی

لغمانی دې څه چل زده کړي له کوم بله

هغه څه کا چال چلند د دنيا والو

ما مله يې ددنيا چې پرېښودله

دا ښايسته دعاج ږمنځ يې په کار نه ده

چې يې سر او ږيره پاک وخريله

څه په کار زري پڼه ده هغه چا ته

چې پښه يې له زنگونه غوڅه کړل

په زينو د زړه رنځور ته ختل گران دی

ما ته لاندې خونه ښه ده له برجله

چې ولس له هرې خوا نه پرېشان وې

ته هم ښه يې پرېشان خيالی اربله