چې له تا سره په سر کاندي سودا

چې له تا سره په سر کاندي سودا

بل به نه وي هسې ما غوندې شيدا

نه به ما غوندې شيدا وي په جهان کې

نه به تا غوندې دلبر شي بل پيدا

ما به صبر ستا په جور و جفا وکړه

ولې نه شي د ژړا په ځای خندا

بې د ستا له مخه کون دی که مکان دی

ښه تو ښه مې نه په دا شي نه په دا

جدايي به دې هېڅ رنگ قبوله نه کړم

څو مې نه وي روح کالبوت سره جدا

کله وروستو مقتديان وړاندې امام وي

ما له تا پسې ده کړې اقتدا

زه يو نه يم درست جهان په تا مېن دی

که بادشاه دی ددې د هر که گدا

کشکې خط دې امانيه و ما راکړی

چې له ما سره وعده کړې د فردا

زه په خپله په تا نه يم مېن شوی

ستا له لوريه په ما شوې ده ندا

زه په تا باندې مېن يم له ازله

نه چې کړې مې نن ورځ ده ابتدا

چې د ستا د عاشقۍ په تېغ شهيد شي

د رحمان غاړه په هله شي ادا