چې نصيب يې سينه چاکه زړه فاگار شه

چې نصيب يې سينه چاکه زړه فاگار شه

جرس ځکه په فرياد او په چغار شه

چې ندا د عاشقۍ په عاشق وشوه

د غفلت له خوبه پاڅېده بيدار شه

عبادت د ريا کار څه په کار نه دی

لکه غُوک هسې په بحر کې مردار شه

د جاهل زُهد په زهد حساب نه دی

لکه مال په خمرو خرڅ د خمر خوار شۀ

مشقت د نادانو واړه پوچ دی

لکه بې بارانه ابر تش غبار شه

علميت د بې عملو عالمانو!

لکه گنج د کتابونو په خره بار شه

چې يې کاندي و نا اهل و ناقابل ته

نصيحت د ناصحانو کوم په کار شۀ

د رحمان کلام په غوږ د بې هنرو

لکه دُر په لاس د طفل هسې خوار شۀ