د ايلم توتيان

چا بند کړی دی پنجرو کښې د ايلم د سر توتيان

چا عقاب په لاس کښېنولے دمړز هسې چغولے

چا منصور په سرو او سپينو او خوږو باندې غلولے

چا قسمت په زور تړلے دگوډۍ هسې لوبولے

نن د کومې بادشاهان دی سکندر او شاه جهان

څوک ځايولے شی کوزو کښې سمندر بې پايان

سېلاب چا دے منع کړے په بندونو د شنو شگو

د قسمت په کور کښې نشته شمېر د ډېرو او د لږو

بادشاهی لښکرې اړئ تل د اوږو او د تږو

فقيري چې فقيری وی بادشاهی ترې شه قربان

چا بند کړی دی پنجرو کښې د ايلم د سر توتيان

چا سرور په لاس کښينولې څوک مستی شی سوزولې؟

د بهار ولولې څوک شی څوک د پښو لاندې کولې؟

که لکونه ژوندی مړۀ کړی ژوند څوک نه شی مړ کولے

چا د بوی نه منع کړی شنۀ گلونه د رېحان؟

چا بند کړی دی پنجرو کښې د ايلم د سر توتيان؟

بلبل ناست بندی پنجره کښې د سپرلی خوبونه وينی

په شړشم زيړ مېدانونه د نرگس گلونه وينی

سرۀ گلاب مست او خندانه د لولو پرونه وينی

وئ رېبار ته راشه يوسه دا پېغام د غنی خان

څوک اچولے شی کوزو کښې سمندر بې پايان؟