د حقيقت ورځ

ډېر ښايسته او سپين مخونه به تک توروي

ډېر ښاغلی به په دغه ورځ سرتور وي

چې پلو له مخه لرې دهر چا شي

دا رنگينې جامې څيرې د ريا شي

حقايق ټول را بهر شي له حجابه

پټ کارونه راڅرگند زما او ستا شي

که رازونه که رمزونه که اسرار دی

لکه ستوری د آسمان هسې رسوا شي

مقصدونه ، غرضونه، عملونه

بې پردې او بې سيرته برالا شي

د تلبيس ښايسته رنگونه ټول شي محوه

پخپل څېر ښکاره روا او ناروا شي

د هر چا زړه کې چې هر څه وي ليکلی

دی پخپله د هغه نقش گويا شي

هغه دغه ښه او بد مخو نه لوڅ کړی

توره شپه له مينځه لاړه شي سبائي

ليک د حق او حقيقت وي په هر لاس کې

د تيارو شپو واقعات واړه رڼا شي