دادب او شعر لویه قهرمانه

دمغلو په کور تندر داسمانه

دوطن داذادۍ سختو جګړو کې

له هر چانه زړور  مرد میدانه

ستا دشعر مصره لاډبره تیر ده

بې ننګې ټوټې ټوټې ستا له  بیانه

وې درزم او دبزم  په مجلس کې

هلته باز دلته بلبل هزار داستانه

عشق او ذوق فکرو تدبیر  اراده عزم

ستا په  پرخه رسیدلې وو بېشانه

هم رستم هم فردوسی دیو داستان یې

هم شاعر هم  مفکر  هم پهلوان یې

قصیدې  لرې  غراء له هره بابه

ننګ غیرت اخلي فتوا ستا له کتابه

دخبرو کور ودان ستا په بیان شو

خدای درکړی ده وینا ډیره جذابه

که جګړه استوار لکه یو غر وې

دعشق کار کې وې  له هر چانه بیتابه

پښتونواله ستا پیغام  ستا فلسفه ده

تا پرې نښوده پښتو چې شي خرابه

ستا په زړه مټ و بازو کې لوی قوت ؤ

ستا په لاس کې توره نه شوله بې  آبه

تا دننګ سبق پښتون  ته دی ورکړی

دخودۍ په فلسفه دې خبر کړی

داجهان ستا په نظر کې نام وننګ ؤ

چې بې ننګه وء هغه درته  بدرنګ ؤ

بل څوک نه وه همدا ته وې ننګیالیه

چې دې داغ  په خاطر ایښې داورنګ ؤ

ډیرې لویې دعوې تاسره  وې زړه کې

په مغلو باندې ځکه ستا غور ځنګ ؤ

هغه باز وې چې لوی ښکار دې ؤ نظر کې

دوطن په سیمه پوله به دې جنګ ؤ

هم دې توره  له هر چانه وه ځلانده

هم دې هرچانه  لوی عزم او فرهنګ ؤ

په دا خپله لویه  برخه وې خوشحاله

تا پاللې ده پښتو او پښتونواله

ستا اشعارو کې  ملي ارزو ځلیږي

خدای خبر دی چې به کله حاصلیږي

لوی پیغام  دې پښتنو ته دې راوړی

ستا په خیال به  چې  پښتون کله  پوهیږي

تا ویلې لوی دریاب ته کوی هڅه

په بیله کې چې نهنګ وي  هلاکیږي

ستا وینا ده  چې اوښ بار سره  راغلی

پښتانه یې غاړکۍ ته خوشحالېږي

دلویانو ارزو وي  هر ګور لویه

واړه هرچیرته په لږ شي قانع کیږي

لوی سړی وې  درسره وولوی فکرونه

مګر ژرنه راویښیږي ولسونه

ستا دیوان که په ادب کې لوی شهکار دی

تا په توره ټو پک کړی هم ډیر کار دی

څلویښت زره لښکر  ستا دلاس له زوره

لوړی شا په تاتره کې  تار په تار دی

دو آبه او دنو ښار  دکوټ په جنګ کې

دمغل په زړه دې ایښې لو ی پر هاردی

دخیبر دره دې سره کړله  په وینو

په اهاړ کې دې لیدلی لاله زار دی

خزانې هاتیان اسونه  که اوښان وو

دغه لویه ولجه ستا دتورې ښکار دی

شجاعت او شهامت درسره مل ؤ

ښه ملګری دې  په توره  کې ایمل ؤ

تا اخیستی له غلیمه  انتقام دی

پښتونو ته دې ګټلی  ننګ ونام دی

په هررنګ کې دې  دننګ خبرې کړی

ملي فکر  ستا مرام  او ستا پیغام دی

مغلواله دې رټلې ډیره زیاته

فرق دې کړی دپردي او دخپل قام دی

غرو رغو کې  دې لښکرې ټولولې

غلیمانو باندی تا تړلې لام دی

په پښتو باندې له سراو او ماله تیروې

ستاله تورې خبرشوی خاص وعام دی

دافغان په ننګ تړلې توره تا وه

درسره لویه ارزو لویه سودا وه