ډهنډ کښې

گوره بلبل په پنجنره کښې جوړ

لوئې يو جهان د گلونو کړو

مست شو صحرا اؤ په خوب کښې ئې

دک ټول جهان د سيندونو کړو

دا روحانی کارخانه زما

زور اؤ ستم نۀ خُمار جوړوی

دا لېونے شانې ځيگر زما

اوښکې پيئ ترېنه هار جوړوی

دا مصور په خپل رنگ مسرور

ټول جهان مست اؤ سرشار وينی

ډهنډ کښې چپې اؤ خندا د سيند

څاڅکی کښې مخ د ابشار وينی

مست شو صحرا اؤ په خوب کښې ئې

ډک کل جهان د سيندونو کړو

ورته سپرلے اؤ ځوانی شو مخکښې

لېونئ ورځ اؤ رنگين ماښام

خوا کښې گلاب ئې په مستئ تير شو

شونډو کښې رنگ اؤ گوتو کښې جام

وړه چپه شوه چرته روانه

د ژوند اؤ مرگ ئې شروع کړوساز

ژوندون ژوندے شو، عشق را زرغون شو

خېشت پټ کړو، شال کښې د مينې راز

بيا خزان راغے گلونه لاړل

ستار شو غلے شراب کم

ځوانی رخصت شوه، خندا نايابه

دُعا اوږده شوه اؤ رباب کم

زړۀ خپل تخت ورکړو "سر"اؤ "سودا" له

وخت شو بادشاه اؤ ژوندون مريې شو

مستئ جنگ بېله توره ئې کيښوه

سرور غلام شو، جنون مريې شو

واړه رنگونه تيارې کښې ډوب شو

سبا رخصت شو اؤ ماښام راغے

اؤ مېخانه شوه د ژړا ډکه

ساقی رخصت شو اؤ امام راغے

خو ناگهانه وړه لولکه

په خوب اودۀ شوه اؤ خوب ئې وليد

نوې سپرلے وۀ اؤ سرۀ گلونه

د عشق ايمان اؤ نرتوب ئې وليد

د خپلې مينې جواب ئې وليد

نوې لولکې نوې گلونه

روښان ئې وليد، يو نوی رنگ کښې

خپل ارمانونه، خپل اميدونه

دا مصور په خپل رنگ مسرور

ټول جهان مست اؤ سر شار وليد

ډهنډ کښې چپې اؤ خندا د سيند

څاڅکی کښې مخ د ابشار وليد

گوره بلبل په پنجره کښې جوړ

لوئې يو جهان د گلونو کړو

ډک ټول جهان د سيندونو کړو

مست شو صحرا اؤ په خوب کښې ئې